Forsendur fyrir möguleika á hjúkrunarrými er að hafa gilt vistunarmat. Jafnframt er hjúkrunarheimilinu Fellsenda fyrst og fremst ætlað að taka á móti geðsjúkum öldruðum og öldruðum með þroskahamlanir frá geðsviði Landspítalans. Á síðari árum hafa yngri einstaklingar flutt að Fellsenda og hefur aldursbil íbúana því breikkað þónokkuð. Einstaklingar hafa einnig fengið að koma að Fellsenda í hvíldarinnlögn með góðum árangri. Þá þarf ekki vistunarmat en ráðuneytið þarf að gefa leyfi fyrir slíkri innlögn.
Vistunarmat er faglegt einstaklingsbundið mat á þörfum einstaklinga fyrir varanlega hjúkrun og vistun á hjúkrunarheimili. Þegar að því kemur að sækja um vist á hjúkrunarheimili þarf fyrst að sækja um vistunarmat til vistunarmatsnefnda í viðkomandi landshluta. Daggjöld til heimila eru ekki greidd nema vistunarmat liggi fyrir. Vistunarmat annast vistunarmatsnefndir heilbrigðisumdæma. Vistunarmat er nú í gagnabanka heilbrigðisráðuneytis og er það sent með rafrænum hætti til Fellsenda.
Allar upplýsingar um hvernig fyrstu skrefin eru þegar sækja á um dvöl á hjúkrunarheimili á Íslandi
Umsóknareyðublað um vistunarmat er á heimasíðu Landlæknisembættisins
Dvalarkostnaður árið 2011
Dvalarkostnaður á hjúkrunarheimilum er greiddur með daggjöldum sem ákveðin eru af heilbrigðisráðuneytinu og félags- og tryggingaráðuneytinu hverju sinni. Daggjöldin sem greidd eru af Tryggingastofnun ríkisins til hjúkrunarheimila eru mishá eftir stofnunum. Þátttaka vistmanna í dvalarkostnaði er tekjutengd og því misjafnlega há eftir tekjum hvers vistmanns. Ef mánaðartekjur vistmanns eru að jafnaði 65.005 kr. eða meira eftir skatta (greiðslur frá Tryggingstofnun ekki meðtaldar) tekur hann þátt í dvalarkostnaði með þeim tekjum sem eru umfram það. Greiðsluþátttaka vistmanna verður þó aldrei hærri en 293.247,- kr. á mánuði. Greiðsluþátttakan hefst fyrsta dag næsta mánaðar eftir að vistunarmat tekur gildi.
Greiðslutilhögun
Við flutning á hjúkrunarheimili falla lífeyrisgreiðslur Tryggingastofnunar til vistmannsins niður frá fyrsta degi næsta mánaðar. Einstaklingar með engar eða lágar tekjur geta átt rétt á vasapeningum. Fullir vasapeningar eru 41.895 kr. á mánuði. Vasapeningar eru tekjutengdir, lækka því með hækkandi tekjum og falla niður ef tekjur eru yfir 64.454 kr. á mánuði. Tryggingastofnun greiðir fullt daggjald til heimilisins. Ef vistmaður á að taka þátt í dvalarkostnaði innheimtir heimilið hans hlut og endurgreiðir hann til Tryggingastofnunar.
