Vorið 2011 hóf iðjuþjálfi störf á Fellsenda og hefur hann aðsetur í iðjunni í gamla húsinu.
Í iðjuþjálfun er unnið með iðjuna, sem er ein af grunnþörfum mannsins. Hún hefur áhrif á heilsu og vellíðan en iðja er allt það sem fólk tekur sér fyrir hendur, að annast sig og sína og að njóta lífsins. Án iðju væri líf okkar gjörsneytt merkingu og tilgangi.
Einu sinni í viku koma íbúar Fellsenda og skiptast á að baka vöfflur fyrir alla. Alla fimmtudaga eru hafðar ákveðnar uppákomur til skiptis, s.s. Bingó, bíó, kaffihús og ljósmyndasýning. Iðjuþjálfi sér um endurhæfingu heimilisfólksins og þar sem Fellsendi er hjúkrunarheimili, þá er markmiðið ekki að fólkið útskrifist heldur viðhaldi andlegri og líkamlegri færni eins lengi og hægt er. Þessi markmið nást með ýmsum hætti, t.d. að finna hlutverk fyrir hvern og einn svo hann finni að hann sé þátttakandi í lífinu og heimilishaldinu á Fellsenda. Gjarnan missir fólk hlutverk og þá færni sem það hafið áður en það lagðist inn á hjúkrunarheimilið því einstaklingurinn verður háður aðstoð starfsmanna heimilisins og getur því ekki séð sjálfur um það sem kallað er "athafnir daglegs lífs" eða ADL. Iðjuþjálfi leitast því við að endurvekja þá færni sem einstaklingurinn hafði áður en hann kom á hjúkrunarheimilið eða að auka færnina.
Í iðjuþjálfun eru notaðar athafnir og verkefni sem einstaklingarnir velja sjálfir að vinna með og tengjast daglegu lífi á heimilinu eða við tómstundir. Tómstundaiðja getur spilað veigamikið hlutverk í bataferli og aukið heilsu og vellíðan. Þátttaka í tómstundaiðju auk annarrar upplyftingar getur ýtt undir sköpunargáfu og andagift ásamt því að styrkja félagsleg tengsl, auka lífsgæði og vellíðan. Fólk upplifir oft ánægju við að búa eitthvað til í félagsskap annarra.
Stundum þarf að sækja um hjálpartæki og sækir iðjuþjálfinn þá um tækin til Sjúkratrygginga Íslands eða kaupir þau beint af söluaðilum hjálpartækja.
Iðjuþjálfi er Ingibjörg Anna Björnsdóttir
